.
الأول كدا يعنى . أيه ضغط عالى ؟؟

هو الضغط اللى يزيد عن 140| 90 
ويستمر على كدا على 3 فترات متقاربة 

✽ أوعى تقيس الضغط وأنت ....

•متنرفز .. زعلان . غضبان .متشاكل مع المودام ..
• بعد الاكل ..
• وانت شارب سيجارة . أو معسل . أو محشش .
•وأنت شارب قهوه أو شاى ..
• وانت طالع السلم . أو عامل مجهود 

أمتى اقيس الضغط ؟

• قيس الضغط وانت هادى . . كيوت خالص 
وقيسه (3) مرات لو هو طلع عالى .

طب العلاج أيه ؟
علاجه حاجتين ...
• علاج دوائى . : . ودا يقرره الطبيب . حسب حالة كل مريض 
• علاج غير دوائى ..: كنتكلم عليه الوقتى. مع شويه نصائح مهمة ...

✽ الاقلال من الملح .. وخللى بالك من كلمه إقلال . مش منع بتاتا .

يعنى ممنوع الملح اللى برة الطبيخ . اللى هوا المخلل . واللفت . والطرشى . والفسيخ . والملوحة ... لكن اللى داخل الاكل . زى الطبيخ . والخضار . والشوربة . والرز . يقلل من الملح بس 

✽ تقلل السمين . زى القشطة . والزبدة . ليّة الخروف . والسمين الله فى اللحمة . وجلد الفراخ . وخلافه .
✽ الانفعال . وحَرقة الدم . والتوتر العصبى 
حتقولى ماأحنا عايشين فيه ..!!

أقولك ابعد عن البرامج اللى بتعصبك . ماتضربش تلفون لواحد قرفان من أهله .
ماتفتحش مواضيع مع واحد بينرفزك 
ماتخبطش على باب . يجيلك منه وجع القلب .

✽ ماتسمعش كلام أم نادر . ولا كلام أم عبده . . . زى :

[[ أشرب كركديه سخن .. لا لا لا . خليه سقعان عشان أعصابك تهدى والضغط ينزل .. أو تقولك : عليك ب الدوم دا سِرّه باتع . 

أو تقولك ياسلام على اللب الابيض وعمايله . أنا مجرباة .. ]] 

انا عن نفسى ماحبش أكسِف حد .. طالما دا بيريحك نفسيا ... إديله لب أبيض .. مش مشكله .

بس أوعى تسيب العلاج .

طبعا لم يثبت علميا نظريات أم عبده الألمعيه .. وإلا نقفل الصيدليات ونولع ونحرق الادويه ونسرّح الناس على الكركدية والدوم والبصل بلا علاج بلا زفت والدكاترة تشحت بعد كدا وحتى بالعقل أكبر دول العالم تقدما وأبحاثا .. يعنى غاب عنهم مؤلفات 

( ابحاث أم الجبالى .. فى علاج الضغط العالى ) !!!

✽ مافيش ضغط عالى للأطفال تحت سن 30 سنة ..
إلا فى حالات نادرة جدا جدا وتحتاج فحص شامل .ومراجعة طبية دقيقة ..

✽ الرياضة :

---------------
مش حقول العب جيم . ومجانص . وكِدا .... لأ . حقولك أمشى . أمشى . أمشى .. الله يخليك . أمشى كتير . وخسس من الكتل المترامية الاطراف دى ..
.
•✽ بالله عليك أكابتن .. تبطّل الزفت الدخان ..
عشان أنت عارف ان الضغط بيجيب تصلب الشرايين . وبعدها جلطة فى القلب أو المخ ..
وكمان احنا عارفين ان ارتفاع بضغط الدم بيعمل تصلب فى الشرايين جامد ..
يبقى تدخين + ضغط عالى = مصيبة مستعجلة .. 
( إما قَريبا . ..... أو بعد حين . دا لو الريح طيب )

✽ حبيب قلبى . يا والدى . ياحاجة .. ماتربطش بين الضغط والصداع .

الضغط حاجة .. والصداع حاجة تانية 
لو عندك صداع .. ولقيت الضغط عالى ... خد علاج للصداع . أى مُسكن أنت بترتاح عليه .. وتانى يوم . لما الصداع يرُوح . قيس الضغط .. وزى ما قلنا .. (3) مرات ..
ولو لسه عالى . ابقى تعالالى ..

✽ طب ممكن سؤال ياباشا ؟

ممكن تعرّفنا . أيه خطورة الضغط الغير معالج . أو نُص معالج ؟ 

• أهم حاجة بيعمل (تصلب فى الشرايين ) اللى حيعمل :
• فشل كلوى . وبالتالى غسيل كلوى 3 مرات فى الاسبوع 
• جلطة فى المخ أو القلب 
• قصور بالشريان التاجى 
• تضخم بعضلة القلب . وبعدها فشل فى عضلة القلب .
.
✽ ماتسمعش كلام الاسطى فتحى :
• عليك بمنقوع الترمس . أو مسحوق الحِلبة العرايشى . أو السِفوف الأسوانى 
• عليك بوصفه عم مختار ( العطار ) الهايلة . الى تجيب الضغط الارض !!
• عليك بمنقوع لبان الدكر ...
• خُد حباية واحدة بس كفاية من بتاعة الضغط . بلاش حبيتين اللى قالك عليه الدكتشور . أوحتى وقفى العلاج . دا بيوجع القلب . وبيعمل هبوط . 
دا العلاج شديد عليكى ياختى .. لسه عليكى بدرى ..
لحسن تتعودى عليه ..
بلاش البرشامة البيضا الكبيرة دى 160 جرام . خدى كانكر خمسة بلاص 
دى الحاجة تفيدة ارتاحت عليها قوى ................... الله يرحمها بقى .
.
. ✽ تزداد خطورة الضغط . وأعراضه الرهيبة المميته ... لو كان :
• الضغط غير معالج .
• معاة سكر غير معالج 
• معاة ارتفاع بالكوليستيرول 
• معاة تدخين 
• معاة كرش محترم . او بدانه .
• تاريخ مرضى لجلطة فى القلب او المخ 
• وراثة

✽ خطوات علاج الضغط

-------------------------------------

. يختلف من طبيب لطبيب 
كل واحد وخبرته . وقناعاته . بس أهم حاجة المتابعة 
.

✽ ياريت تعمل شيك أب على وظائف الكلى . والكبد والكوليستيرول والدهون . وصورة دم كاملة . وبول . ياريت ...

................................................... انتهت .....................